Физикчид ураны шинэ изотопыг гаргаж авчээ

Хятадын Хүнд Ионы Судалгааны Төвийн физикчид ураны хамгийн хөнгөн изотоп болох уран-214 (²¹⁴U)-ийг гарган авчээ.  

Байгаль дээрх ураны 99.3%-ийг ²³⁸U, 0.7%-ийг ²³⁵U, маш бага хувийг ²³⁴U эзэлдэг бөгөөд эдгээр бүх изотопууд цацраг идэвхтэй, альфа задралаар задардаг мөн хагас задралын үе нь 159200 жилээс 4.47 тэрбум жилийн хооронд байдаг. 

Шинэ ураны изотоп болох ²¹⁴U-ийг үүсгэхийн тулд физикчид тангстен-182 (¹⁸²W) бай цөмийг аргон-36 (³⁶Ar)-аар бөмбөгдөж ¹⁸²W(³⁶Ar, 4n)²¹⁴U урвалыг явуулжээ. “Энэ урвалыг явуулахад мөргөлдөөн болгон бидний хүссэн атомыг үүсгэхгүй байсан тул ураны-214 атомыг үүсгэхэд хэцүү байсан. Ойролцоогоор 10¹⁸ сум бөөм бай цөмтэй мөргөлдөхөд хоёр нь л уран-214 цөмийг үүсгэсэн.” хэмээн тэд хэлжээ.  

Судлаачид уран-214  цөмийн задралыг ажиглаж хагас задралын үе нь 0.52 миллисекунд хэмээн тодорхойлжээ. Өмнө тэд ижил төрлийн туршилтаар уран-216 болон уран-218 изотопуудыг нээсэн бөгөөд хагас задралын үе нь 2.25 миллисекунд болон 0.65 миллисекунд байсан. Мөн тэд ²¹⁴U болон ²¹⁶U нь бусад ураны изотопуудтай харьцуулахад альфа задралд орох буюу 2 протон 2 нейтроноо алдах нь амархан байгааг ажиглаж энэ магадлал нь цөмд байх протон нейтроны хоорондын харилцан үйлчлэл нь бусад изотопуудаасаа илүү хүчтэй байгаатай холбоотой хэмээн таамаглажээ.  

Хэвлэгдсэн өгүүлэл: DOI: 10.1103/PhysRevLett.126.152502 

Эх сурвалж: https://www.newscientist.com/article/2274847-physicists-have-created-a-new-and-extremely-rare-kind-of-uranium/ 

http://www.sci-news.com/physics/uranium-214-09658.html

Мэдээ бэлтгэсэн: ЦФСТ-ийн ЭША Т.Мөнх-Эрдэнэ